اردو پاکستان کی قومی اور آزاد کشمیر کی قومی کے علاوہ دفتری زبان بھی ہے۔ اسے حکومت آزادکشمیر نے ۴ اپریل ۱۹۷۶ء کو ایک حکم نامے کے تحت نافذ کیا۔ ہماری مختصر تاریخ میں اس پر اتار چڑھاؤ آتے رہے لیکن بہرحال اردو اس ریاست کے دونوں حصوں میں رابطے کی زبان بھی ہے۔ اس کی تدریس ایف اے/ایف ایس سی/آئی کام/آئی سی ایس کی سطح تک لازمی مضمون کے طور پر ہے جبکہ بی اے کی سطح پر اسے اختیاری مضمون کے طور پر پڑھایا جاتا ہے۔ آزادکشمیر یونیورسٹی میں شعبہ اردو کا قیام دسمبر ۲۰۱۴ء کو عمل میں لایا گیا اور تدریس ۲۳ فروری ۲۰۱۵ء کو شروع ہوئی۔ شعبہ کا پہلی ہی بار ۴۲ طلبہ و طالبات نے انتخاب کیا جن میں ۳۳ طالبات اور ۹ طلبہ شامل تھے۔ اس شعبہ کو ایک اچھی فیکلٹی میسر آئی جس میں سب اساتذہ ایم فل یا پی ایچ ڈی تھے۔ کلاسوں کا اجراء ابتدائی طور پر کشمیر اسٹڈیز چہلہ کیمپس میں کیا گیا اور کلاسوں کے اوقات صبح کے رکھے گئے۔ شعبہ اردو کے پہلے رابطہ کار پروفیسر اکرام الرشید تھے اور ۱۵ مارچ ۲۰۱۶ء کو ڈاکٹر عبدالکریم کو اس شعبے کا پہلا سربراہ بنایا گیا۔ اس وقت شعبہ اردو میں میقات اول اور سوم میں تدریس جاری ہے۔ میقات اول میں ۵۲ طلبہ و طالبات زیر تعلیم ہیں جن میں ۱۷ طلبہ اور ۳۵ طالبات شامل ہیں۔

(۱) طلبہ و طالبات کو اردو زبان و ادب کی معیاری تدریس کروانا نیز اردو ادب کی بیش بہا روایات سے آگاہی دینا۔
(۲) زبان و بیان کے اسرار و رموز سے آگاہی، طلبہ کی پوشیدہ تخلیقی صلاحیتوں کی دریافت اور کم تر صلاحیتوں کی نگہداشت اور تربیت۔
(۳) طلبہ و طالبات کو سیمیناروں، ادبی نشستوں، تحقیقی مقالوں، مضامین اور نامور ادباء و شعراء کی تخلیقات سے تعارف کے ذریعے اردو زبان و ادب کی تاریخ سے متعارف کروانا اور ان کو موجودہ دور کے لسانی و ادبی مسائل کا ادراک بہم پہنچانا۔
(۴) جدید رسمیات تحقیق کے ذریعے طلبہ و طالبات کا رابطہ اردو دنیا سے کروانا اور اردو میں ہونے والی جدید تحقیق سے ان کو متعارف کروانا۔ نیز پاکستانی جامعات کے شعبہ ہا اردو کے علاوہ بیرون دنیا کی جامعات سے روابط و استفادہ۔
(۵) طلبہ و طالبات کو جدید دور کے تقاضوں سے اردو ادب کے ذریعے ہم آہنگ کرنا نیز فرقہ وارانہ فضا میں اردو زبان اور اس کے روادار ماحول کو پروان چڑھانے کی کوشش کرنا۔ نیز تہذیبی معیار پر علمی و ادبی اختلاف رائے کے لیے ذہن سازی کرنا۔
(۶) مختلف اصناف ادب کی تکنیک اور ان کے بنیادی تقاضوں سے روشناسی نیز ادبی و علمی مکالمہ کی فضا بنانا۔
(۷) شعبہ اردو کے علمی، تحقیقی و تنقیدی رسالے کے اجرا کے لیے کوششیں کرنا۔ مستقبل میں شعبہ اردو کو ایم فل اور پی ایچ ڈی کی سطح تک لے جانا۔
(۸) اردو کو حقیقی معنوں میں سرکاری و قومی زبان بنانے کے لیے ہر سطح پر کوششیں کرنا۔ اس سلسلے میں سیمیناروں، لیکچروں، کانفرنسوں، علمی و ادبی محافل، مذاکروں کے انعقاد کے علاوہ مطبوعہ و برقی ذرائع سے کام لیا جائے گا۔ اس کے علاوہ افسر شاہی اور عدلیہ سے روابط کے لیے بھی مربوط کوششیں کی جائیں گی۔

ای میل: urdu@ajku.edu.pk

دفتر: 05822-960522